الشعر الكل يعرف أنه رمز جمال المرأة العربيه ..
وأنه شي مقدس عند البعض والشعر يلفت الأنتباه ب حيويته وجماله .
مثلي مثل معظم البنات اللي تحلم بشعر طويل وكثير وبنفس الوقت يكون جميل ، وأنا للاسف أني من وقت طويل وأنا متعبه شعري بالصبغات والقصات والجرائم الكثيره اللي ارتكبتها بحق شعري ..
بالبداية راح أتكلم عن شعري من كم سنه وبالذات من بدأت أصبغ وكانت بس تنزل وتطلع الجذور اتضايق من شكله وارجع اصبغه اما بالنسبه للشي الإيجابي اللي كنت أسويه هو أني بشكل شبه شهري كنت أقص منه و أوقات كثيره كنت أقص أكثر من النص !
بعد فتره لاحظت تساقط وكنت أقول هذا تساقط طبيعي ويوم بعد يوم لاحظت أن الكل صار يشكي من وجود شعري بكل مكان ؟ وقتها بس استوعبت أني وصلت مرحلة تساقط كبير مو طبيعي أبدا .. بخوف كبير كنت أتنقل من موقع لموقع غيره وأبحث عن حلول البنات اللي مروا في نفس حالتي .
وقتها أبوي ما تحمل الحال اللي كنت فيها وخصوصا أنه من المهتمين والمحبين للشعر الطويل والصحي على البنت ف أخذني للدكتور ووقتها صرف لي تونر او محلول للشعر وأستخدمته فتره والحمدلله وقف التساقط نهائيا بعد شهر تقريبا.
ومرت سنتين او ثلاث على هذي القصة و بشهر ٦ من سنة ١٤٣٨ رجعت لنفس النقطه اللي هي تساقط غير طبيعي نتيجة أهمال والاستخدام المبالغ للحرارة والفير وغيره - أول حاجه فكرت فيها أنو أرجع أستخدم نفس المحلول اللي استخدمته قبل لكن للأسف ما حصلته بالصيدليات لذلك رجعت أبحث من جديد على حل ..
وبيوم من الأيام عمتي أرسلت لي خلطة للشعر وكأن فيه عليها مدح كبير جدا وأقتنعت فيها أو بالأصح أني اضطريت عليها عشان احافظ على شعري من التساقط ' الخلطه كانت قناع المعجزه للدكتوره هند' وهي غنية عن التعريف ..
بدأت في أستخدام القناع مره بالأسبوع وكنت من داخلي متشككه في فعاليته ومتخوفه .
الأستخدام الأول كان عادي ، الأستخدام الثاني كان هو بريق الأمل بالنسبه لي لأني لاحظت وأنا أغسل شعري أن فيه كم شعره بس اللي كانت تطيح وبالفعل باقي الأسبوع كان التساقط أخف وهنا أنا أغرمت في هذا القناع وبدأت أعتمده في روتيني كل جمعه...
بعد استخدامه لشهر لاحظت أن شعري تحسن بشكل جدا كبير واحسن من النتيجة اللي حصلت عليها قبل سنين .
قناع المعجزة بكتبه لكم حتى لو فيه أي وحده تحتاج تعالج شعرها تستخدمه وتفرح بالنتائج الجميله ..
بالاخير بكتب لكم اللي لاحظته بشعري بعد إستخدام القناع :
وقف التساقط نهائيا ، لمعة بالشعر ، حيوية وصار أقوى من قبل بكثير ، لون جميل أستغنيت بسببه عن الصبغات ، طال شعري أسرع من أي وقت ثاني ، وبعد فيه شغله أنا حبيتها أن شعري رجع مثل أيام الطفوله ..
انتو جربوها وأحكمو عليها بنفسكم وأتمنى لكم تجربة موفقة وشعر جميل .
0 التعليقات