دائما نسمع كلمة إنجاز ويقترن فيها الشعور بالسعاده .
اكيد معظمنا سمع عن الشعور الجميل اللي تحس فيه لما تنجز شي ما ، والأكيد أن معظمنا حس أنه كلام مبالغ فيه او مبتذل
لكن السؤال اللي راح يبين لك هل هو صحيح او لا هو [انت جربته ؟ ]
لان التجربة خير برهان .. ولان لما تحس بالشي بنفسك يكون ابلغ من الف كلمة توصف لك المعنى .
انا كنت لما اقرأ او أسمع من اي شخص أحس أنه شي مبالغ فيه ، كان من وجة نظري أنه بس ترتاح او بمعنى أوضح [ هم وانزاح ] لكن مثل ما قلت بالبداية التجربة هي الدليل ...
طيب جربتيه ؟
ايه نعم جربته ، كان الوصف اللي تكلموا عنه او كتبوا عنه حقيقه ولاني حسيت وقتها بشعور جميل وبطاقه إيجابيه كبيره ،وخصوصا اني كنت مأجله هذي المهمات من فتره بسبب الكسل والجوال حسيت أني عضو فعال في العالم . فعليا فيه أشياء بحياتنا نماطل فيها بزياده وإنجازها مايحتاج غير دقايق بسيطه او مجهود بسيط لكننا نختار راحة البال او بالاصح نختار الكسل والتأجيل لاننا نكون شايلين همها بداخلنا ...
أتركوا كلامي على الهامش وهاتوا ورقة وقلم وأكتبو لكم كذا مهمه انتو مأجلينها او شي من المفترض تنجزونه و من بكره حاولوا تنجزوا اللي تقدروا عليه وقتها بس تفهموا أنا وش اللي أتكلم فيه وأتمنى تكتبوا لي شعوركم وقتها هنا ...
لكم كل الحب ، وأتمنى لكم إنجاز عظيم تستحقونه